- 710 -

1447. März 4.

Vnsern fruntlichen grus zuuor. Erbern, weizen, lieben frunde. Vns hat vorgelegt der tuchtige Nickel Gerisdorff von Konigishayn, wie ir in etlichermosse in vordechtnisse hett von sachen vnd rede wegen, des her vnschuldig sey vnd sich gerne ken euch rechtfertigen weide vnd spricht, wie her sich dirbotin hette mit euch vorczukomen vor ewir erbfrawe die furstynne, vor den bund, vor vns adir sust vor erbere stete vnd rete etc. sich mit euch dirkennen lossen, das ir allis von im vorslagen hett, als her spricht, vnd ist noch bietende mit euch vor vns vnd vnsern rat vnd wil genug an vns haben vnd hat vns gebeten gleich vnd bescheidenlich vor in zuschreiben vnd zubieten, als bitten wir euch fruntlichen mit fleisse, ir wellit solche bescheidenheit von ihm vffnemen vnd die sachen also lossen gutlichen anstehin zwisschen hie vnd Ostern nehistekomende vnd bynnen des eynen nemlichen tag vorczunemen vnd benennen, ap euch das gefellet, so welden wir euch an beiden teilen zu fruntschafft vnd beheglichkeit die sachen vnd schelunge vorhoren vnd vorsuchen mit fleisse, ap wir die in bessere wege czwischen euch brengen vnd vorhandiln muchten, durch gutes gemaches vnd gelympfes willen, vnd wes euch hyroff zu synnen ist, das wellit vns ewir antwort wieder vorschreiben. Geben des sonnabundes vor dem sontage Reminiscere etc. anno XLVII°.
Ratmanne der stat Breslow.

Mit Rückaufschrift an den liegnitzer Rath.

Orig. Kgl. Bibl. z. Berl Ms. Boruss. f. 568. No. 23.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866